A empresa de distribución Gadis organizou este xoves na Coruña o 6º Foro Gadis coas ONG, un evento que puxo en valor o traballo diario dalgunha das máis de 200 entidades sociais coas que colabora en Galicia e Castela e León. O encontro, celebrado no Centro de Extensión Universitaria e Divulgación Ambiental de Galicia (CEIDA), tivo como obxectivo visibilizar o papel fundamental que desempeñan estas organizacións.

A xornada tamén se puido seguir en directo a través da canle de Youtube de Gadis.

A directora de Marketing e RSC de GADISA Retail, Melisa Pagliaro, destacou a importancia do foro como “un espazo de encontro no que as asociacións comparten experiencias e aprendizaxes”. Segundo Pagliaro, esta escoita activa axuda a comprender mellor as necesidades reais da sociedade, porque “a solidariedade tamén se constrúe escoitando”.

Lembrou que o compromiso da compañía é anterior á popularización da Responsabilidade Social, e engadiu que “en 2025, impulsamos máis de 2.400 iniciativas sociais, deportivas e culturais”.

A mesa redonda do foro reuniu a responsables de tres organizacións que traballan con colectivos vulnerables. Mónica Rioboo Bonome, directora do Centro Integrado de Atención Social de Padre Rubinos, explicou que o seu modelo de traballo se basea na “asistencia integral, individualizada, impulsora da súa autonomía e interdisciplinar” para ofrecer novas oportunidades ás persoas sen fogar.

Pola súa banda, Pablo Sánchez, traballador social da Cociña Económica da Coruña, subliñou o reto de fomentar hábitos saudables mentres se atende a un volume crecente de persoas.

“Temos que garantir dar de comer a máis de mil persoas”, afirmou, explicando que moitas familias recollen os menús para levar, o que fai fundamental ofrecer unha alimentación sa e equilibrada.

Nesta liña, Alberto Tabernero, responsable do centro Acouga xestionado por ACCEM, unha ONG especializada na atención a persoas en risco de exclusión social, insistiu en que o acompañamento individualizado é unha peza clave para a súa integración efectiva na sociedade.

O labor dos bancos de alimentos tamén tivo un espazo destacado. O presidente do Banco de Alimentos de Vigo, José Ramón Santamaría, describiu a magnitude da súa operativa diaria: “Cada día desde os nosos almacéns distribuímos 5.000 quilos a 159 entidades, que á súa vez atenden a máis de 22.000 persoas”.

A responsable de comunicación da entidade, Ruth Villar, falou da “marea azul”, a rede de 2.600 voluntarios que fan posible este traballo.

Villar destacou a importancia de iniciativas como o “Maio Solidario” de Gadis, xa que grazas a elas “recollemos moitísimo máis”. Unha das voluntarias, Pilar Garea, agradeceu a oportunidade de colaborar, afirmando que a experiencia lle permitiu descubrir a historia que hai detrás de cada familia: “Recibo moito máis do que eu dou”.

Finalmente, a directora da Asociación Dano Cerebral de Santiago, Rocío García, abordou como esta condición impacta na vida das persoas, tanto na infancia como na idade adulta.

Salientou a importancia da prevención e de ofrecer recursos ás familias. “É necesario que as familias teñan información para saber como manexar a situación”, sostivo, poñendo tamén o foco na disfaxia, a dificultade para alimentarse que afecta a moitas destas persoas.